1۔
نرم دلی
"معمولی چپقلش پر شقی القلب چچا نے سات سالہ بھتیجے کو قتل کرکے لاش کے ٹکڑے ٹکڑے کر دیئے۔"
ٹی وی بریکنگ نیوز چل رہی تھی۔ نیوز کاسٹر واقعے کی تفصیلات بتا رہا تھا۔ وہ تاسف سے سر ہلاتے ہوئے اپنی دوست سے کہہ رہی تھی،
"چھوٹی چھوٹی باتوں پر قتل۔۔۔۔ دنگا۔۔۔ فساد۔۔۔
انسانیت۔۔۔ احساس۔۔۔ مروت کی موت واقع ہو چکی ہے۔ خدا خوفی ختم ہوگئی ہے۔۔۔۔ توبہ۔۔۔۔ ایسی خبریں سن کر تو دل دہل جاتا ہے۔"
جوس کا گلاس پکڑاتے ہوئے گھر میں کام کرنے والی بچی کو ٹھوکر لگی۔۔۔۔۔ اور چھناکے کی زوردار آواز سے گلاس ٹوٹ گیا۔ وہ آگ بگولہ ہو کر اٹھی اور بچی کو لاتوں گھونسوں پر رکھ لیا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
2۔
جانے کہاں گئے وہ دن
تنگ و تاریک، پرپیچ گلیاں۔۔۔۔
آج وہ ایک مدت کے بعد انہیں گلیوں میں کوچہ گردی کر رہا تھا جہاں اس کا بچپن گزرا تھا۔
جگہ جگہ رک کر وہ عہد رفتہ کو آواز دیتا۔۔۔
پیار و اخلاص کو یاد کرتا اور آگے بڑھ جاتا۔
جگہ وہی تھی۔۔۔
منظر وہی تھا۔۔۔
ویسی ہی گہما گہمی تھی۔۔۔۔
لیکن پھر بھی ہر چیز بدلی ہوئی تھی۔۔۔ شاید لوگ بدل گئے تھے اور انداز بھی۔ ایک دوڑ لگی تھی۔۔۔ سب کو پچھاڑ کر آگے بڑھنے کی۔۔۔
رویوں سے خلوص، مروت، مہر و محبت دم توڑ چکی تھی۔۔۔۔
آہ۔۔۔
جانے کہاں گئے وہ دن۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
3۔
ان فضاؤں میں یہ کیسا احساس ہے
لوگوں کے پرجوش نعروں سے فضا گونج رہی تھی۔ ہر زبان پر ایک ہی نعرہ تھا۔
اللہ اکبر۔۔۔
پاکستان زندہ باد۔۔۔
سب کے ہاتھ میں سر سبز پرچم لہرا رہے تھے ۔۔۔۔۔
سامنے رینجرز کے جوان اپنے مخصوص انداز میں پرچم اتار رہے تھے۔ ان کے پیروں کی دھمک اور نعرے لوگوں کے جوش و ولولے میں اضافہ کر رہے تھے۔
میری نگاہوں کے سامنے سات سال پہلے کے واقعات گھوم گئے۔
یہی جگہ تھی،
یہ منظر تھا،
لیکن آنکھیں اشکبار تھیں۔۔۔
ایک دن پہلے ہی خودکش دھماکے سے جان بحق ہونے والوں کو دفنایا تھا۔
لیکن ہاتھوں میں پرچم سر بلند تھے۔۔۔
اور زبانوں پر اللہ اکبر اور پاکستان زندہ بعد کے نعرے۔۔۔
اپنوں کو کھویا تھا۔۔۔ ہمت و حوصلہ نہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
افسانہ "پھوک" میں پڑھیں ایک ایسی لڑکی کی کہانی جو اپنا سب کچھ کھو چکی تھی، لیکن قسمت نے پلٹا کھایا اور »»» پھوک
4۔
دغابازی
وہ کمرے میں داخل ہوا اور ہاتھ میں پکڑی فائل میز پر پٹخ کر صوفے پر بیٹھ گیا۔ اس کی بیوی نے غور سے اس کے چہرے کی جانب دیکھا۔
"کیا ہوا؟ اتنے غصے میں کیوں ہیں؟"
"ہونا کیا ہے! وہی کاروباری چخ چخ۔۔۔ "
اس نے لہجے میں بیزاری سموتے ہوئے کہا۔
"اب کیا ہوا؟ صبح تو آپ بہت پرجوش تھے کہ آج ایک بڑا ٹینڈر ہاتھ آنے والا ہے۔"
"ہاتھ تو آ جاتا۔۔۔۔ اگر اسلم دغا نہ دیتا "
"کیا مطلب؟"
"اسے اچھی طرح علم تھا کہ میں اس ٹینڈر کو حاصل کرنا چاہتا ہوں اور اس کے لیے کافی تگ و دو بھی کر رہا ہوں۔۔۔ بلکہ ایک میٹنگ میں تو وہ بھی میرے ساتھ تھا۔۔۔ لیکن اس دھوکہ دیا اور ٹینڈر لے اڑا۔۔۔"
اس کے لہجے میں غصہ اور نفرت بھرا ہوا تھا۔
"جانے دیں۔۔۔ کیوں غصہ کرکے اپنی طبعیت خراب کرتے ہیں۔ آپ نے خود ہی تو کہا تھا کہ کاروباری معاملات میں سب چلتا۔۔۔ پچھلی بار آپ نے بھی تو زیادہ پیسے دے کر ٹینڈر ان سے چھین لیا تھا۔"
0 تبصرے